site4any

Free downloadable Tamil & Tamil dubbed movies, Free Tamil books & News, Articles, Health tips…

Posts Tagged ‘தமிழ் கட்டுரை’

கவனிப்பாரற்று கிடக்கும் சாலை திட்டங்கள்….

Posted by sambala87(சூரியன்) on May 4, 2011

தேசிய நெடுஞ்சாலை அதிகார ஆணையத்தின் கீழ், 2009ம் ஆண்டு ஒப்புதல் அளிக்கப்பட்ட, சென்னை – பெங்களூரு இடையிலான எக்ஸ்பிரஸ் ஆறு வழி சாலை திட்டத்தில், கடந்த இரண்டு ஆண்டுகளாக, எந்தவொரு முன்னேற்றமும் இல்லையென, தெரிய வந்துள்ளது. சென்னை துறைமுகம் – மதுரவாயல் இடையிலான பறக்கும் சாலை திட்டம் மற்றும் மதுரை ரிங் ரோடு அமைக்கும் திட்டம் ஆகியவையும் கண்டுகொள்ளப்படாமல் இருப்பது, அதிகாரப்பூர்வமாக வெளிவந்துள்ளது.

சென்னைக்கும், பெங்களூருக்கும் இடையில், ஆறு வழி எக்ஸ்பிரஸ் சாலை அமைப்பது என்று முடிவு செய்து, 2009ல் மத்திய அரசு ஒப்புதல் அளித்தது. தேசிய நெடுஞ்சாலை மேம்பாட்டுத் திட்டம்-6ன் கீழ், இந்த திட்டம் அனுமதிக்கப்பட்டது. ஏறத்தாழ 16 ஆயிரத்து 680 கோடி ரூபாய் செலவில் இந்த திட்டம், வரும் 2015ம் ஆண்டிற்குள் அமைக்கப்படவுள்ளதாக அறிவிக்கப்பட்டது.நேற்று மத்திய சாலைப் போக்குவரத்து அமைச்சகம் சார்பில் வெளியிடப்பட்ட, தேசிய நெடுஞ்சாலை அதிகார ஆணையத்தின் அறிக்கை விவரங்கள், இந்த திட்டம் கடந்த இரண்டு ஆண்டுகளாக எந்தவொரு முன்னேற்றமும் அடையவில்லை என்பதை வெளிச்சம் போட்டுக் காட்டியுள்ளது.

கடந்த 2009, ஜூலை மாதம், இந்த எக்ஸ்பிரஸ் சாலை, எந்த வழியில் அமைப்பது என்று முடிவெடுக்கப்பட்டு, ஆய்வறிக்கை தயாரிக்கப்பட்டது. 2009ம் ஆண்டு ஏப்ரல் 30ம் தேதி, இதற்கான ஒப்பந்தமும் போடப்பட்டது.பின், 2009ம் ஆண்டு ஆகஸ்டில், மாதிரி வரைவு திட்டமும் தயார் செய்யப்பட்டு சமர்ப்பிக்கப்பட்டது. அதன் பிறகு இந்த சாலை அமைக்கும் திட்டம் குறித்த பணிகள் எதுவும் துவக்கப்படவில்லை என்பது, அந்த அறிக்கையில் கூறப்பட்டுள்ளது.இதே திட்டத்தோடு சேர்ந்து ஆரம்பிக்கப்பட்ட, வதேத்ரா – மும்பை இடையிலான 400 கி.மீ., தூரம் கொண்ட ஆறு வழிச் சாலை அமைக்கும் திட்டம், தீவிர முன்னேற்றத்தில் உள்ளதாக தெரிவிக்கப்பட்டுள்ளது. இந்த திட்டத்திற்கான விரிவான திட்ட அறிக்கை தயார் செய்யப்பட்டு தயார் நிலையில் உள்ளதால், பணிகள் துவங்க வேண்டியது தான் பாக்கி என்று தெரிவிக்கப்பட்டுள்ளது.இத்தனைக்கும் சென்னை – பெங்களூரு இடையிலான ஆறு வழி எக்ஸ்பிரஸ் சாலை திட்டத்திற்கு, தமிழகம், ஆந்திரா, கர்நாடகா என, மூன்று மாநில அரசுகளுமே ஒப்புதல் அளித்துவிட்டன. ஆனாலும், மத்திய அரசு இந்த திட்டத்திற்கு, போதிய முன்னுரிமை அளிக்காமல் இருக்கும் நிலை காணப்படுகிறது.

அதேபோல, தேசிய நெடுஞ்சாலை மேம்பாட்டுத் திட்டம்-7ன் கீழ், தமிழகத்திற்கு இரண்டு திட்டங்கள் கிடைத்தன. அதில், சென்னை துறைமுகத்தில் இருந்து, மதுரவாயல் வரை, பறக்கும் சாலை அமைக்கும் திட்டம். இந்த திட்டம், 2008லேயே ஒப்புதல் கிடைக்கப் பெற்று, 1,485 கோடி ரூபாய் வரையிலான செலவில் தீட்டப்பட்டது. இந்த திட்டத்திற்கான, “கான்ட்ராக்ட்’ விடும் பணி, 2009ம் ஆண்டு, ஜனவரியில் விடப்பட்டது. ஆனால், இன்னும் பணிகள் ஆரம்பிக்கப்படவில்லை. ஏறத்தாழ இரண்டரை ஆண்டுகள் ஆகியும், பணிகள் ஏன் துவக்கப்படவில்லை என்பது குறித்து அந்த அறிக்கையில் காரணம் எதுவும் தெரிவிக்கப்படவில்லை. மற்றொரு திட்டம், மதுரையில் ரிங் ரோடு திட்டம். இதுவும், தேசிய நெடுஞ்சாலை மேம்பாட்டுத் திட்டம்-7ன் கீழ், 2009ம் ஆண்டு ஏப்ரலில் கிடைத்தது. ஆனால், இந்த திட்டத்தில் சிறிது கூட முன்னேற்றம் இல்லை.

அந்த அறிக்கையில் நிறுத்தி வைக்கப்பட்டுள்ள திட்டங்கள் வரிசையில், கோயம்புத்தூர் ரிங் ரோடு திட்டம், திருச்சி ரிங் ரோடு திட்டம், திருநெல்வேலி ரிங் ரோடு திட்டம் ஆகியவையும் குறிப்பிடப்பட்டுள்ளன.என்ன காரணத்தினால் இந்த திட்டங்கள் எல்லாம் காத்திருக்கும் பட்டியலுக்கு தள்ளப்பட்டுள்ளன என்ற விவரம் தெரியவில்லை.

தகவலறிந்த வட்டாரங்கள் கூறியதாவது: தமிழகத்திற்கு கிடைத்த இந்த திட்டங்கள் அனைத்தும், ஐக்கிய முற்போக்கு கூட்டணியின் முதல் ஆட்சியில் கிடைத்தவை. அப்போது, தமிழகத்தைச் சேர்ந்த டி.ஆர்.பாலு அமைச்சராக இருந்தார். இரண்டாம் முறையாக ஐக்கிய முற்போக்கு கூட்டணி ஆட்சி மலர்ந்தபோது, அமைச்சராக கமல்நாத் பொறுப்பேற்றார். அவர், நெடுஞ்சாலைத் துறை உயர் அதிகாரிகளுக்கு வாய் வழியாக, “ஏற்கனவே சாலை திட்டங்கள் பலவற்றையும் தமிழகம் பெற்றுவிட்டது. எனவே, தமிழகத்திற்கான திட்டங்களை கருத்தில் கொள்ள வேண்டாம்’ என, உத்தரவிட்டுள்ளார். இதுதான், தமிழக சாலை திட்டங்கள் கவனிக்கப்படாமல் கிடப்பதற்கான உண்மையான காரணம்’ என்று தெரிவிக்கின்றன.

(dm)

Posted in Article, Hot News | Tagged: , | Leave a Comment »

வல்லரசுகளின் தீவிரவாதம் அங்கீகரிக்கப்படுகிறதே…

Posted by sambala87(சூரியன்) on May 3, 2011

பாகிஸ்தானில் மறைவிடத்தில் வசித்துவந்த ஒசாமா பின்லேடன் அமெரிக்க தனிப்படையால் சுட்டுக் கொல்லப்பட்டது, அமெரிக்க அரசையும் அமெரிக்கர்களையும் மிகப்பெரும் மகிழ்ச்சியில் ஆழ்த்தியுள்ளது.

உலகம் முழுவதும் தீவிரவாதம் பரவிக் கிடப்பதால், இந்த வெற்றியை உலக நாடுகள் அனைத்தும் பாராட்டியிருக்கின்றன. தீவிரவாத அமைப்பான அல்காய்தா மீதான இந்த பலத்த அடி உலக அளவில் பரவிக் கிடக்கும் வெவ்வேறு தீவிரவாத அமைப்புகளுக்கும், பாண்டியன் பிரம்படிபோல, வலியை ஏற்படுத்தும் என்கிற எதிர்பார்ப்புதான் காரணம்.

மூவாயிரத்துக்கும் மேற்பட்ட பெண்கள், ஆண்கள், குழந்தைகளைக் கொன்று குவித்த ஒரு தீவிரவாதியை இன்று கொன்றுவிட்டோம் என்று உலகுக்குச் செய்தி சொன்ன அமெரிக்க அதிபர் ஒபாமா, இந்தப் போர் முந்தைய அதிபர் கூறியதைப் போல இஸ்லாமியருக்கு எதிரான போர் அல்ல. இது இஸ்லாமியர்களையும் கொன்று தீர்த்தவனும் இஸ்லாமியர்களில் ஒருவனுமான தீவிரவாதிக்கு எதிரானது என்று கூறியிருக்கிறார்.

ஆனால், பின்லேடன் போன்ற ஒரு தீவிரவாதியை உருவாக்கியது அமெரிக்காவின் பணமும், அமெரிக்காவின் பேராசையும், ஆப்கனிஸ்தானில் அமெரிக்காவின் அத்துமீறலும்தான் என்பதையும் அவர் நினைவுகூர்ந்திருக்க வேண்டிய தருணம் இது. அமெரிக்காவால் உருவான தீவிரவாதம், அமெரிக்காவை மட்டுமல்ல, வளரும் நாடாகிய இந்தியா உள்ளிட்ட பல்வேறு நாடுகளையும் பாதித்துள்ளது. புதிய தீவிரவாதிகளை அல்காய்தா வளர்த்தெடுக்கும் நிலையையும் உருவாக்கியது.

இன்று தங்களால் வளர்க்கப்பட்ட முன்னாள் நண்பனான இந்நாள் எதிரியை அமெரிக்கா வீழ்த்தி இருக்கிறது. அவர்கள் கொண்டாடுகிறார்கள். இதில் ஒன்றை நாம் நினைத்துப் பார்க்க வேண்டியிருக்கிறது. அமெரிக்கா போன்ற வல்லரசுக்கே பின்லேடனைக் கொன்று பழிதீர்க்க பத்து ஆண்டுகள் ஆனது என்றால், இந்தியா போன்ற வளரும் நாடுகளால் இந்தத் தீவிரவாதிகளை எவ்வாறு எதிர்கொள்ள முடியும் என்பது நினைக்கவே வேதனை தருவதாக இருக்கிறது.

அமெரிக்காவுக்கு வலிமை இருக்கிறது, பணம் இருக்கிறது, ஆகையால் இரட்டை கோபுரம் தகர்க்கப்பட்டவுடன் ஆப்கன் தேசத்துள் புகுந்து ஆட்சியை மாற்றிவிட்டு, தேடுதல் வேட்டையை நடத்த முடிகிறது. பாகிஸ்தானுக்கு ஆயிரமாயிரம் கோடி பணத்தை அள்ளிக் கொடுத்துக் கொண்டு, அவர்கள் பின் லேடனை தங்கள் பாதுகாப்பில் வைத்திருக்கிறார்கள் என்று தெரிந்தும், புன்னகையுடன் உறவாடவும், மிரட்டவும் முடிகிறது. இல்லையென்றால், பாகிஸ்தானுக்குள், அமெரிக்கா ஒரு தனிப்படையுடன் நுழைந்து, பின்லேடனைச் சுட்டுக் கொன்றுவிட்டு அமெரிக்காவுக்குத் திரும்ப முடியுமா?

மும்பையில் தாக்குதல் நடத்திய தீவிரவாதிகளுக்கு மூளையாகச் செயல்பட்ட நபர்களைப் பெயரைக் குறிப்பிட்டு பிடித்துக் கொடுங்கள் என்று கேட்டாலே, இந்தியாவை உதாசீனப்படுத்தும் பாகிஸ்தான், இதுவரை தனது நாட்டுக்குள் அமெரிக்காவின் ஒரு சிறிய தனிப்படை உள்ளே வந்து பின்லேடனைச் சுட்டுக் கொன்றுவிட்டுச் சென்றது பற்றி வாய்மூடி ஒரு வார்த்தை பேசாமல் மவுனியாக இருக்கிறதே, அதை என்னவென்று சொல்வது?

இதுகுறித்து அமெரிக்க ராணுவ அதிகாரிகள் பத்திரிகைகளுக்கு பேட்டி அளித்தபோது, அந்த சிறிய தனிப்படை குறித்த கேள்விக்கு அவர்கள் அளித்த ஒரே பதில், இந்த நேரத்தில் அதைப் பற்றி எதுவும் சொல்ல முடியாது என்பதுதான். உங்கள் தாக்குதல் திட்டத்தை பாகிஸ்தானுக்குச் சொல்லிவிட்டு அங்கே போனால், பின்லேடனைத் தப்பிச்செல்ல விட்டுவிடுவார்கள் என்று கருதித்தான் நீங்கள் அவர்களிடம் சொல்லவில்லையா என்ற கேள்விக்கும் இந்த நேரத்தில் இதுபற்றி பேச வேண்டாம் என்பதுதான் அவர்களது பதில்.

பின்லேடன் சுட்டுக் கொல்லப்பட்டதன் மூலம் முகம் கிழிந்து அம்பலப்பட்டிருப்பது பாகிஸ்தான். தீவிரவாதிகளுக்கு அடைக்கலம் கொடுத்து வருகிறது என்ற குற்றச் சாட்டை ஆயிரம் முறை மறுத்த பாகிஸ்தான் இனி எந்த முகத்தோடு மற்ற நாடுகளுடன் பேசும்? எத்தனை பொய்கள், என்னென்ன கதைகள்! அத்தனையும் இன்று அம்பலமாகிவிட்டது.

ஐந்து ஆண்டுகளுக்கும் மேலாக, மிகப் பெரிய மாளிகையில் சகோதரர் மற்றும் தனது இளம்மனைவி உள்ளிட்ட குடும்ப அங்கத்தினர்களுடன் இருப்பதை இத்தனை காலமும் கண்காணித்து, அது பின்லேடன்தான் என்பதை உறுதி செய்து 40 நிமிடத்தில் கதையை முடித்த அமெரிக்காவின் சாதனை பாராட்டுக்குரியதுதான்.

சுட்டுக்கொல்லப்பட்ட அடுத்த நிமிடம் இந்தத் தகவலை, அமெரிக்க அதிபர் தனது முந்தைய அதிபர்களான ஜார்ஜ் புஷ், பில் கிளிண்டன் ஆகியோரிடம்தான் சொல்கிறார். அவர்கள் தேசத்தை ஒன்றாகப் பார்க்கிறார்கள். உலகம் முழுவதும் அமெரிக்கா அயோக்கியத்தனம் செய்கிறது என்று சொன்னாலும், இந்த அரசியல் பலம்தான் அவர்களது வெற்றிக்கு அடிப்படையாக இருக்கிறது.

பாகிஸ்தான் சும்மா இருக்குமேயானால், இந்தியாவின் சிறியதொரு தனிப்படை அங்கே சென்று, மும்பைத் தாக்குதலில் 200 பேரைக் கொன்று குவித்தவர்களைப் பிடித்து, இந்தியாவுக்கு கொண்டுவரவும் முடியும். இந்திய ராணுவத்திடமும் புலனாய்வுப் பிரிவிடமும் அதற்கான திறமையும் இருக்கிறது. இந்தியாவுக்கு அரசியல் பலம்தான் இல்லை.

உள்ளவன் சொல்வதெல்லாம் உண்மையல்லாமல் என்ன, வென்றவன் சொல்வதெல்லாம் வேதமல்லாமல் என்ன, என்பார் கவியரசு கண்ணதாசன். உண்மை. அமெரிக்கா செய்தால் அது சாதுர்யம், சாகசம், நியாயம். இந்தியாவோ, வேறொரு நாடோ செய்தால், அது அந்நிய நாட்டுக்குள் நடத்தப்பட்ட அத்துமீறல். ஒரு பயங்கரத் தீவிரவாதி கொல்லப்பட்டான் என்று மகிழ்ச்சியும் அடையலாம். வல்லரசுகளின் அதிகாரபூர்வமான தீவிரவாதம் அங்கீகரிக்கப்படுகிறதே என்று வருத்தமும் படலாம். அது, அவரவர் பார்வையைப் பொருத்தது!

(di)

Posted in Article | Tagged: , | Leave a Comment »

“3ஜி’ ஏலம் ரூ.1 லட்சம் கோடி லாபம்…ஆனா “2ஜி’….

Posted by sambala87(சூரியன்) on April 29, 2011

தாய்மார்களுக்கு சத்தான உணவு கிடைக்காததால், இந்தியாவில் பிறக்கும் குழந்தைகளில் மூன்றில் ஒரு பங்கு சத்து குறைந்த குழந்தைகளாக பிறக்கின்றன. ஐந்து வயதுக்குள் உள்ள குழந்தைகளில் சரிபாதி குழந்தைகள், குறைவான எடையுள்ள குழந்தைகளாக உள்ளன.

இந்நிலையில், காமன்வெல்த் போன்ற மிக அதிகமான செலவு செய்த விளையாட்டுக்கள் நம்நாட்டுக்கு தேவைதானா என்ற கேள்வி எழுகிறது. விளையாட்டு போட்டிகளால், ஊரின் கட்டமைப்பு உயருகிறது. வெளிநாட்டுக்காரர்கள் வருவதால், சுற்றுலா பெருகுகிறது. ஆயிரக்கணக்கானவர்களுக்கு வருமானம் தரும் தொழிலில் சுற்றுலா பெரும்பங்கு வகிக்கிறது.

சுற்றுலாவால் நாட்டின் பெருமையும், மரியாதையும் உயருகிறது. இவ்வளவையும் தரவேண்டியதை, நடைபெற்று முடிந்த, “காமன்வெல்த் விளையாட்டு’ தந்ததா, என்பதும் ஒரு கேள்வி. சரி,”2ஜி’ ஸ்பெக்ட்ரம் விவகாரத்துக்கு வருவோம். மேலே சொன்ன நலிந்தவர்களை தூக்கிவிட, மக்கள் நல அரசுக்கு தேவை நிதி. அதை அள்ளித் தருகிற, “அட்சய பாத்திரம்’மாக, “2ஜி’ இருந்தது. ஆனால், அதில் கிடைத்த வருமானம் போய்ச் சேர்ந்ததோ, ஒரு சில தனிப்பட்ட குடும்பங்களுக்கு மட்டுமே.

“2ஜி’க்கு பிறகு நடைபெற்ற, “3ஜி’ ஏலம், பிரணாப் முகர்ஜி தலைமையில் வெளிப்படையாக நடந்தது. அதனால், 35 ஆயிரம் கோடி ரூபாய் லாபம் எதிர்பார்த்த ஏலம், ஒரு லட்சம் கோடி ரூபாயை ஈட்டித் தந்தது. அப்போது தான், “2ஜி’யின் செல்வாக்கு என்ன, அதில் வந்த வருமானம் என்ன என்பது நாட்டு மக்களுக்கு தெரிந்தது. நாட்டையே உலுக்கிய மிகப்பெரிய ஊழல் விவகாரம் வெளிச்சத்துக்கு வந்தது.

காமன்வெல்த் போட்டிகளுக்காக செலவழித்ததாக கூறி சுருட்டப்பட்டது மக்களுடைய வரிப்பணம்; “2ஜி’ ஸ்பெக்ட்ரம் ஊழலில் கொள்ளையடிக்கப்பட்டதும், மக்களுக்கு வந்து சேர்ந்திருக்க வேண்டிய பணம். இந்த பணம் இரண்டு பேரால் மட்டுமே சுருட்டப்பட்டதாக இப்போதைக்கு தெரியவந்துள்ளது.

இவர்கள் வெளியில் தெரியும் முகங்களே. ஒளிந்திருக்கும் முகங்கள் யார் யார், அவர்களுக்கு சென்று அடைந்தது எவ்வளவு, ஆட்சியும், அதிகாரமும் தான் அவர்களை காப்பாற்றிக் கொண்டிருக்கிறதா? “பதவி இழந்த பிறகும், மரியாதை பெறுபவனே பண்பாளன்’ – இது சாணக்கியன் கூற்று. பதவி போன பிறகு இவர்கள் நிலை என்ன, செல்லாக் காசா, ஜெயில் வாசமா, காலம்தான் பதில் சொல்லும்.

(dm)

Posted in Article | Tagged: , , | Leave a Comment »

தமிழகத்தில் தண்ணீர் தட்டுப்பாடு நீங்குமா?

Posted by sambala87(சூரியன்) on April 28, 2011

நீர்பாசனம் குறித்து நூற்றுக்கணக்கான ஆய்வறிக்கைகளை சமர்ப்பித்துள்ள சிவனப்பன், 25க்கும் அதிகமான நூல்களை எழுதியுள்ளார்; தமிழ்நாடு வேளாண் பல்கலைக் கழக நீர் நுட்ப மையத்தின் முன்னாள் இயக்குனர்; தமிழ்நாடு திட்ட கமிஷனின் முன்னாள் உறுப்பினர்; சொட்டுநீர் பாசன முறையின் தந்தை என்று அழைக்கப்படும் இவர், நதிநீர் இணைப்பின் அவசியம் குறித்து விளக்குகிறார்.

இந்தியா, நீர்வளம் நிறைந்த நாடு. ஆனால், தமிழகம் நீர் பற்றாக்குறை மாநிலம். நாட்டில், ஆண்டுக்கு மழை அளவு சராசரியாக, 1,150 மி.மீ., தமிழகத்தில், 925 மி.மீ., நாட்டில், ஒருவருக்கு அளிக்கப்படும் தண்ணீரின் அளவு, 2,000 கன மீட்டர். ஆனால், தமிழகத்தில் கிடைக்கும் தண்ணீரின் அளவு, 750 கன மீட்டர் தான். அதாவது, நாட்டில் உள்ள மற்றவர்களை ஒப்பிடும்போது, தமிழகத்தில் மூன்றில் ஒரு பங்கு நீரைத் தான் வழங்க முடிகிறது.இந்நிலையில், தமிழகத்தின் நீர்ப் பற்றாக்குறையை எப்படி போக்க முடியும் என்ற கேள்வி எழுகிறது. அதற்கு, நீர் சேமிப்பு, அறுவடை, மேலாண்மை ஆகியவை தான் முக்கிய வழியாக இருக்கின்றன. நாம் ஆயிரம் ஆண்டுகளுக்கு முந்தைய பாசன முறையைத் தான் கடைபிடித்து வருகிறோம். இந்த பாசன முறையில் மாற்றத்தை ஏற்படுத்த வேண்டும்.

அடுத்தது, மழையால் கிடைக்கும் உபரி நீரை சேமிக்க வேண்டும். குறிப்பாக கடலில் கலக்கும் நீரை பயன்பாட்டுக்கு கொண்டுவர வேண்டும். கடலுக்குச் செல்லும் நீரின் அளவு ஆண்டுக்கு, 150 முதல், 200 டி.எம்.சி., நீர் என்று கணக்கிடப்படுகிறது. இதை, சிறு அணைகள் கட்டி, ஆறுகளில் சேமிக்கவேண்டும். நீர்பிடிப்புப் பகுதிகளில், மேலாண்மைத் திட்டங்களை அறிவியல் ரீதியாக செயல்படுத்த வேண்டும். விவசாய பயிர்களில் நெல்லுக்கு, 72 சதவீதமும், கரும்புக்கு, 12 சதவீதமும், பிற பயிர்களுக்கு, 10 சதவீதமும் தண்ணீர் தேவைப்படுகிறது. இதை மீதப்படுத்துவதற்கு, சொட்டு நீர் மற்றும் தெளிப்பு நீர் பாசன முறைகளை நாம் தொடர்ந்து கையாள வேண்டும். இதன் மூலம், ஒரு எக்டேருக்கு செய்யப்படும் சாகுபடியில், பெரும்பகுதி நீரை சேகரிக்க முடியும்.

இதை தவிர, கழிவு நீரை மறு சுத்திகரிப்பு செய்து பயன்படுத்தும் முறையை முழுமையாக அமல்படுத்த வேண்டும். இவையெல்லாம், நமக்கு தற்போது கிடைக்கும் நீரை சேமிக்க எடுத்துவரும் நடவடிக்கைகள். ஆனால், இவற்றையெல்லாம் விட, இயற்கையாக கிடைக்கும் நீரை, சேமிப்பது தான் மிக முக்கியமான பணி. இயற்கையாக மழை மூலம் கிடைக்கும் நீர், பெருமளவு கடலில் தான் கலக்கிறது. இந்நிலையில், ஆற்றிலிருந்து கடலுக்கு சென்று கலக்கும் நீரையாவது நாம் சேமிக்க வேண்டும். மாநிலத்தில் உள்ள ஆறுகளிலிருந்து கடலுக்குச் சென்று கலக்கும் நீரை சேமிக்க, தமிழகத்தில் உள்ள நதிகளை இணைக்க வேண்டும். அடுத்தகட்டமாக தென்னிந்திய நதிகளை இணைக்க வேண்டும்.

கேரளாவில் பெய்யும் மழையில், 250 டி.எம்.சி., தண்ணீர் கடலுக்குத் தான் செல்கிறது. அங்கு பெய்யும் மழையில், 10 சதவீத நீரைத் தான் நாம் பயன்படுத்துகிறோம். கேரளாவில் கடலுக்கு செல்லும் நீரை திருப்பி, தமிழகத்திற்கு கொண்டு வந்தால், நம்முடைய நீர் தேவை பெருமளவு சரிகட்டப்படும்.இதற்காக, “பம்பா-அச்சன்கோவில் திட்டம்’ தேசிய நீர் மேலாண்மை முகமை மூலம் தயாரிக்கப்பட்டுள்ளது. இந்த திட்ட மதிப்பு, 1,500 கோடி ரூபாய் என வரையறுக்கப்பட்டது. ஆனால், இந்த திட்டம் இதுவரை நிறைவேற்றும் நிலைக்கு வரவில்லை.மேற்கு தொடர்ச்சி மலையில் இருந்து, கர்நாடக மாநிலத்தின் வழியாக அரபிக் கடலில் கலக்கும் நீரின் அளவு, 2,000 டி.எம்.சி., இந்த நீரை காவிரி வழியாக திருப்பி, பயன்பாட்டிற்கு கொண்டு வருவதற்கு, திட்டங்கள் உருவாக்கப்பட்டு, திட்ட மதிப்பீடும் தயாரிக்கப்பட்டுள்ளது. ஆனால், இத்திட்டத்தை நிறைவேற்ற நடவடிக்கை எடுக்கப்படவில்லை.

அடுத்ததாக, ஒடிசாவில் உள்ள மகாநதி, ஆந்திராவில் கோதாவரி ஆகிய நதிகளின் வழியாக கடலில் கலக்கும் நீர், 800 டி.எம்.சி., ஆகும். இந்த இரு நதிகளையும் இணைத்து, கிருஷ்ணா நதி வழியாக, காவிரி ஆற்றுக்கு நீரை கொண்டு வந்து, அதிலிருந்து வைகை ஆற்றுக்கு நீரை கொண்டு வருவது மற்றொரு திட்டம். இதற்கான, ஆய்வுகள் நடந்தும் திட்டம் கிடப்பில் போடப்பட்டுள்ளது. அடுத்ததாக, கங்கை, பிரம்மபுத்திரா ஆகிய நதிகளை இணைப்பது மற்றொரு பெரிய திட்டமாக உள்ளது.பொதுவாக, நதிகள் இணைப்பு என்பதற்கு தைரியமும், பொறுப்பு எடுத்துக்கொண்டு அதை நிறைவேற்றும் உறுதியும் தேவைப்படுகிறது. இது இல்லாவிட்டால், நதிகள் இணைப்பு சாத்தியமில்லை.

இத்திட்டங்களை நிறைவேற்ற பணம் முட்டுக்கட்டையாக இருக்கிறது என்பதை ஒத்துக்கொள்ள முடியாது. இத்திட்டங்களை செயல்படுத்துவதற்கு, பணத்தை திரட்டுவது ஒரு மிகப்பெரிய காரியமல்ல. வருங்காலத்தில் நீரின் தேவை அதிகரித்துக் கொண்டே செல்லும் நிலையில், நதிகள் இணைப்பு இன்றியமையாதது என்பதை உணர்ந்து, 12வது ஐந்தாண்டு திட்டத்தில் நதிகள் இணைப்பை சேர்த்து, செயல்படுத்த வேண்டிய கட்டாயத்தில் நாம் இருக்கிறோம்.

(dm)

Posted in Article | Tagged: , | Leave a Comment »

புதியன விரும்பு

Posted by sambala87(சூரியன்) on April 27, 2011

திருடனின் போக்கு கற்றவனுக்குப் போலீஸ் வேலை, வாக்கு கற்றவனுக்கு வாத்தியார் வேலை’ என்கிற சொலவடை காலத்தால் மருவி, “போக்கத்தவனுக்கு போலீஸ் வேலை, வக்கத்தவனுக்கு வாத்தியார் வேலை’ என்றானது ஒருபுறம் இருக்க, இப்போது ஆசிரியர்களாகப் பணிபுரிய முன்வருவோர் தங்கள் படிப்புக்கேற்ற வேலைபெறும் திறமை இல்லாமல் கடைசிப்புகலிடமாக ஆசிரியர் தொழிலுக்கு வருவது அதிகரித்து விட்டது.

தமிழ்நாட்டில் மட்டும் 663 ஆசிரியர் பயிற்சிக் கல்லூரிகள் மற்றும் கல்வியியல் கல்லூரிகள் உள்ளன. இவற்றில் 5 அரசுக் கல்லூரிகள், 7 தன்னாட்சிக் கல்லூரிகள் நீங்கலாக 651 தனியார் ஆசிரியர் கல்வியியல் கல்லூரிகள் இருக்கின்றன. தனியார் கல்லூரிகளில் மாணவர் சேர்க்கை எப்படி நடத்தப்படுகிறது என்பதும், எவ்வளவு பணம் கொடுத்தும் பி.எட். பட்டம் பெற்றுவிடத் துடிப்போர் மனநிலையும், இவர்களுக்கு ஆசிரியர் பணி கிடைத்தால் அவர்கள் எந்த அளவுக்கு ஈடுபாட்டுடன் பணியாற்றுவார்கள் என்பதும் நினைத்தாலே வேதனைதரும் விஷயமாகத்தான் இருக்கிறது.

அரசுப் பள்ளிகளில் மாணவர் சேர்க்கை குறைந்து போனதற்கும், வெறும் சம்பளம் மட்டுமே குறிக்கோளாகவும், கற்பித்தலில் ஆர்வம், ஈடுபாடு இல்லாமலும் பல பேர் ஆசிரியர்களாகப் பணியமர்த்தப்படுவது அதிகரித்ததற்கும் தொடர்பு இருக்கிறது. இதைக் கல்வியாளர்கள் அறிவார்கள். அரசியல்வாதிகள் மட்டுமே இதைக் கண்டும் காணாததுபோல இருப்பார்கள். ஏனென்றால் இன்றைய இந்த நிலைமைக்குக் காரணமே அரசியல்வாதிகள்தான்.

வேறு வேலை கிடைக்காததால் இதைச் சம்பளத்துக்காக ஏற்றுக்கொள்ளும் தொழிலாக ஆசிரியர் பணி ஆகிவிடாமல் இருக்க முதல்கட்டமாக தற்போது பி.ஏ.பி.எட். என்கிற நான்காண்டு ஒருங்கிணைந்த இளநிலைப் பட்டப்படிப்பு அடுத்த கல்வியாண்டு முதல் அறிமுகம் செய்யப்படவுள்ளது என்று தமிழ்நாடு ஆசிரியர் கல்வியியல் பல்கலைக்கழகத் துணைவேந்தர் டி. பத்மநாபன் அண்மையில் அறிவித்திருப்பது புதிய நம்பிக்கையைத் தருகிறது.

இத்தகைய ஒருங்கிணைந்த நான்கு ஆண்டுகளுக்கான படிப்பில் சேருவோர், நிச்சயமாக கற்பித்தல் மட்டுமே தனக்கான தொழில் என்று முடிவு செய்தவர்களாக இருப்பார்கள். வேலை கிடைக்காதவர்களின் புகலிடமாக பள்ளிக்கூடம் மாறும் நிலைமைக்கு மெல்ல முற்றுப்புள்ளி வைக்கப்படும்.

இந்த நான்காண்டு பட்டப்படிப்பு குறித்து, புனே பல்கலைக்கழகம் வெளியிட்டுள்ள மாதிரிப் பாடத்திட்டம் சிறப்பானதாக இருக்கிறது என்பது இத்துறையில் இருப்போரின் கருத்தாகும். இந்த மாதிரி பாடத்திட்டத்தின்படி, முதல் மூன்றாண்டுகள் முழுவதும் கற்பித்தல் தொடர்பான வெவ்வேறு பாடப்பிரிவுகள் இடம்பெறுகின்றன. நான்காவது ஆண்டு களப்பயிற்சிக்காக ஒதுக்கப்படுகிறது. இந்த ஆண்டு முழுவதும் கற்பித்தல், மாணவர் – ஆசிரியர் உறவு, பள்ளிச் சூழல், மாணவர் உளவியல், பள்ளி நடவடிக்கைகளில் பங்கேற்பு என்பதாக வடிவமைக்கப்பட்டுள்ளது.

இந்த மாதிரிப் பாடத்திட்டத்தின் சிறப்பு அம்சம் என்னவென்றால், ஒவ்வொரு பாடத்திலும் 50 விழுக்காடு மதிப்பெண் எடுத்தால் மட்டுமே தேர்ச்சி பெற்றதாகக் கொள்ளப்படும். மேலும் இரண்டாமாண்டு இறுதித் தேர்வு எழுதும் மாணவர், முதலாண்டு எழுதிய தேர்வுத் தாள்களில், மூன்றில் இரண்டு பங்கு தாள்களில் தேர்ச்சி பெற்றிருந்தால் மட்டுமே தேர்வெழுத அனுமதிக்கப்படுவார். இதே நடைமுறை மூன்றாம், நான்காம் ஆண்டுகளிலும் பின்பற்றப்படும். இத்தகைய நிபந்தனை ஒரு மாணவர் இந்த கல்வித்திட்டத்தை வெறும் பொழுதுபோக்காக இல்லாமல் தீவிரமாகக் கற்க வேண்டிய கட்டாயத்தை உண்டாக்குகிறது.

ஆனால், இவை தமிழகத்தின் தனியார் கல்வியியல் கல்லூரிகளுக்கு வேம்பாகக் கசக்கும் என்பது நிச்சயம். புனே பல்கலைக்கழகம் தயாரித்துள்ள மாதிரிப் பாடத்திட்டத்துக்கு இணக்கம் தெரிவிக்க மாட்டார்கள். தேர்ச்சிக்கான மதிப்பெண்ணைக் குறைக்க முற்படுவார்கள். எத்தனை தாள்களில் தோல்வியுற்றாலும், ஆண்டுதோறும் தேர்வெழுத அனுமதிக்க வேண்டும் என்பார்கள்.

இதெல்லாம் தமிழ்நாட்டுக்கு ஒத்துவராது என்பார்கள். தமிழக அரசும் கல்வித் துறை அதிகாரிகளும் கவனமாக இருப்பார்களேயானால், நல்ல பாடத்திட்டத்தை உருவாக்கி, அதன் மூலம் நல்ல ஆசிரியர்களை உருவாக்க முடியும். அடுத்துவரும் இரண்டு தலைமுறை நல்ல கல்வி கற்கும் சூழலை உருவாக்க முடியும். இதில் கல்வித்துறை சமரசம் செய்துகொள்ளக்கூடாது. லஞ்சம் பெற்றுக்கொண்டு, எந்தவிதமான வசதிகளும், பயிற்றுநர்களும் இல்லாமலேயே தனியார் கல்வியியல் கல்லூரிகள், பி.ஏ.பி.எட். நடத்த கண்மூடித்தனமாக அனுமதித்தால், பாரதியார் சாபம் பலிக்கும். “படிச்சவன் சூதும் பாவமும் பண்ணினால் போவான் போவான் ஐயோன்னு போவான்’.

பி.ஏ.பி.எட். படிக்கும் மாணவர்களுக்கே ஆசிரியர் தொழிலில் முன்னுரிமை என்பதைத் தமிழக அரசு தெளிவாக அறிவித்தால், வேறுவேலை கிடைக்காமல் ஓராண்டு பி.எட். படிப்போர் எண்ணிக்கை குறையும். அத்துடன், தமிழகத்தில் சில ஆண்டுகளுக்கு முன்பு இருந்ததைப் போல ஆசிரியர் நியமனங்கள் தனித்தேர்வுகள் மூலம் நடத்தப்பட வேண்டும். அப்போதுதான் திறமையுள்ளவர்கள் மட்டுமே ஆசிரியர்களாக வருவார்கள். வெறும் வேலைவாய்ப்பு அலுவலகப் பதிவு மூப்பு அடிப்படையில் நியமித்தால், ஆசிரியர் பணியிடம் நிரப்பப்படும்; ஆனால் கற்பிக்கும் ஆசிரியர்கள் இருக்கமாட்டார்கள்.

(di)

Posted in Article | Tagged: , | Leave a Comment »

 
Follow

Get every new post delivered to your Inbox.

Join 90 other followers