Tag Archives: தமிழ் கட்டுரை

தி.மு.க.,வின் கோபம் யார் மீது?

“இப்போதும் நான் தான் முதல்வரா, என் ஆட்சி நடக்கிறதா என, எனக்கே தெரியவில்லை. தேர்தல் கமிஷன் சாதாரண மக்களையும் துன்புறுத்துகிறது. கட்சிகளின் அன்றாட நடவடிக்கையில் தலையிடுகிறது…’ சட்டசபை தேர்தல் ஓட்டுப்பதிவுக்கு முன், தி.மு.க., தலைவர் கருணாநிதி தேர்தல் கமிஷன் மீது கொண்ட கோபத்தின் வெளிப்பாடாக உதிர்த்த வார்த்தைகள் இவை. ஆனால், அவரது உண்மையான கோபம், தேர்தல் கமிஷன் மீது அல்ல, காங்கிரஸ் மீதுதான் என, அரசியல் வட்டாரத்தில் பேசப்படுகிறது.

தமிழகத்தில் மாநில தலைமை தேர்தல் அதிகாரியாக இருந்த நரேஷ்குப்தா ஓய்வு பெறும் முன், அப்பதவியில் நியமிப்பதற்காக மூத்த ஐ.ஏ.எஸ்., அதிகாரிகள் பட்டியலை தமிழக அரசு தயார் செய்து, மத்திய தேர்தல் கமிஷனுக்கு அனுப்பியது. ஆனால், தமிழக அரசு பரிந்துரை செய்த மூன்று அதிகாரிகளையும் நிராகரித்து, தி.மு.க.,விற்கு முதல் அதிர்ச்சியை அளித்தது மத்திய தேர்தல் கமிஷன். அதோடு, மூன்று அதிகாரிகளின் பெயரைக் குறிப்பிட்டு, அவர்களது பெயரை பரிந்துரைக்குமாறு கமிஷன் கேட்டுக் கொண்டது. அதன்படி, முதல்வர் கருணாநிதி, மூவரில் ஒருவராக பிரவீன்குமார் பெயரையும் தமிழக அரசின் சார்பில் பரிந்துரைத்தார். தேர்தல் தேதி அறிவிக்கப்படும் வரை அமைதி காத்த பிரவீன்குமார், தேதி அறிவிக்கப்பட்டவுடன் சாட்டையை சுழற்றத் துவங்கினார்.

இதனிடையே, சட்டசபை தேர்தல் அறிவிக்கப்பட்ட சில நாட்களில், முதல்வரின் மனைவி தயாளு, மகள் கனிமொழி எம்.பி., கலைஞர், “டிவி’ நிர்வாக இயக்குனர் சரத் ஆகியோரிடம், சி.பி.ஐ., விசாரணை நடத்தியதோடு, தி.மு.க., தலைமை அலுவலகம் அமைந்துள்ள அண்ணா அறிவாலயத்தில் இயங்கும் கலைஞர், “டிவி’ அலுவலகத்திலும் நுழைந்து சோதனை நடத்தியது. ஸ்பெக்ட்ரம், “2 ஜி’ வழக்கில் குற்றப்பத்திரிகையும் தாக்கலானது. தேர்தல் கமிஷன் விதிமுறைகளை, பிரவீன்குமார் கடுமையாக அமல்படுத்தியதால் தி.மு.க.,வின், “தேர்தல்பணி’ கடுமையாக பாதிக்கப்பட்டது. மத்திய அமைச்சர் அழகிரி உட்பட முக்கிய பிரமுகர்களின் கார்களிலும் சோதனை நடந்தது. முக்கிய தி.மு.க., பிரமுகர்களின் வீடுகளில் சோதனை, எம்.பி., ரித்தீஷ் கைது, ஜெ., வேட்புமனு தாக்கலின்போது ஏற்பட்ட மோதலில், தி.மு.க.,வினர் மீது வழக்கு பதிவு என, அடுத்தடுத்த சம்பவங்கள் நடந்தேறின. தி.மு.க.,வினர் மீது வழக்கு பதிவு பற்றி, திருச்சி போலீஸ் கமிஷனர் வன்னிய பெருமாளிடம் முதல்வர் கருணாநிதி கேட்டபோது, “எல்லாம் சட்டப்படி நடந்துள்ளது’ என்ற பதில் கிடைத்ததால் அதிர்ச்சியானது தி.மு.க., வட்டாரம். அதோடு, அமைச்சர் நேருவுக்கு நெருக்கமானவரின் பஸ்சில், 5.25 கோடி ரூபாய் சிக்கியது நாட்டையே உலுக்கியது.

இது போன்ற சம்பவங்களால், தேர்தல் கமிஷனின் செயல்பாட்டை கண்டித்து, முதல்வர் மேடைக்கு மேடை பேசும் சூழல் ஏற்பட்டது. இதற்கு பதிலளிக்கும் வகையில் மத்திய தலைமை தேர்தல் கமிஷனர் குரேஷியின் பதில் அமைந்தது. அவர் கூறும்போது, “பிற மாநில தேர்தல்களை ஒப்பிடுகையில், தமிழகத்தில் அதிக தேர்தல் விதிமீறல்கள், வழக்கு பதிவுகள் நடந்துள்ளது. தேசிய அளவில் தேர்தல் நடக்கும் நான்கு மாநிலங்களில் பிடிபட்ட, 54 கோடி ரூபாயில், 48 கோடி ரூபாய் தமிழகத்தில் இருந்து மட்டும் பிடிபட்டுள்ளது’ என்றார். தன்னைச்சுற்றி என்ன நடக்கிறது என, ஆரம்பத்தில் புரியாமல் திணறிய முதல்வர் கருணாநிதி, இது மத்திய அரசின் யோசனையுடன் நடக்கிறது என்று சந்தேகமடைந்தார். ஒருபுறம் நேரடியாக, சி.பி.ஐ., மூலமும், மற்றொரு புறம் தேர்தல் கமிஷன் மூலமும், தி.மு.க.,வுக்கு “செக்’ வைக்கப்படுவதாக உணர்ந்தார். இவ்வளவு பிரச்னையிலும், ஒரு வார்த்தை கூட தேர்தல் கமிஷன் குறித்து டில்லி காங்கிரஸ் தலைமை கண்டிக்காதது அவரது சந்தேகத்தை அதிகமாக்கியது. மத்திய அரசு நினைத்திருந்தால், தேர்தல் கமிஷனின் கட்டுப்பாட்டை தளர்த்தியிருக்க முடியும்; ஆனால், அதை செய்யாததன் மூலம், நமக்கு நெருக்கடி கொடுக்கிறது என்று நம்புகிறது தி.மு.க., தலைமை.

இதன் எதிரொலியாக, கோவையில் நடந்த பிரசார கூட்டத்தில், “நடப்பது தேர்தல் போல அல்ல; எமர்ஜென்சி காலம் போல உள்ளது’ என்று தி.மு.க., தலைவர் ஆவேசப்பட்டார். எமர்ஜென்சியை தேர்தல் கமிஷன் போன்ற அமைப்பு ஏற்படுத்த முடியாது. மத்திய அரசால் மட்டுமே ஏற்படுத்த முடியும் என்பதை உணர்ந்த கருணாநிதி, மத்திய அரசை மறைமுகமாக சாடத்துவங்கினார். மத்திய அரசில் பங்கேற்றிருந்தாலும், காங்கிரசுக்கும் தங்களுக்குமான இடைவெளி அதிகரித்து வருவதை கருணாநிதி உணர்ந்திருந்தார். மத்திய அரசையும், காங்கிரஸ் கட்சியையும் இயக்கும் ராகுல், கருணாநிதியுடனான உறவை விரும்பாதது அதற்கு காரணமாக அறியப்பட்டது. அதற்கேற்ப, சட்டசபை தேர்தல் பிரசாரத்தின் போது, சோனியாவுடன் மட்டுமே கருணாநிதி பிரசார கூட்டத்தில் பங்கேற்றார். ராகுல், பிரதமர் மன்மோகன் சிங் ஆகியோர் தமிழகத்தில் பங்கேற்ற கூட்டத்தில் கருணாநிதி பங்கேற்கவில்லை.

சமீபத்தில் கருணாநிதி, “மே 13ம் தேதி தேர்தல் முடிவு அறிவித்து, 16ம் தேதிக்குள் பதவி ஏற்க வேண்டுமெனில், எப்படி பல முடிவுகளை எடுக்க முடியும். அரசு அமைப்பதில் எத்தனை பணிகள் உள்ளது’ என, மீண்டும் புலம்பியுள்ளார். ஒருவேளை தேர்தல் முடிவில் தி.மு.க., கூட்டணிக்கு சாதகமாக அமைந்தால், மே 13, 14, 15ம் தேதிக்குள், காங்., – பா.ம.க., ஆகியோரிடம் கூட்டணி ஒப்புதல் பெற்று ஆட்சியை, அமைச்சரவையை அமைத்துவிட முடியுமா என்ற சந்தேகத்தின் வெளிப்பாடு தான் இந்த புலம்பல். “இப்போதாவது ஏதாவது செய்யுங்கள்’ என்ற நோக்கில் காங்கிரசுக்கு வேண்டுகோள் விடுப்பது போல் இது அமைந்துள்ளது. தேர்தல் கூட்டணியில் துவங்கிய தி.மு.க., – காங்., மோதல், தேர்தல் முடிவு சாதகமாக அமைந்தாலும், ஆட்சி அமைப்பது வரை தொடரும் என்பதை சிம்பாலிக்காக காங்., கட்சியினர் வெளிப்படுத்தி வருகின்றனர்; தி.மு.க., தலைமையின் கோபத்தையும் ரசித்து வருகின்றனர். எப்படியிருந்தாலும், தி.மு.க., – காங்கிரஸ் கூட்டணியில், தேர்தலுக்கு முன்பு நடந்த பரபரப்பு காட்சிகள், தேர்தலுக்கு பின்பும் தொடரும் என்பதை இரு கட்சி வட்டாரங்களும் உறுதிப்படுத்துகின்றன.

(dm)

Advertisements

இன்டர்நெட் உபயோகம் வரமா… சாபமா…?

இன்டர்நெட் மூலம் உலகமே உள்ளங்கையில் வந்து விட்டது.
இவ்வளவு பெரிய விஞ்ஞான வளர்ச்சி, பல்வேறு வகைகளில் சமூக மேம்பாட்டிற்கு உதவினாலும், கலாசார சீர்கேடுகள் உருவாகாமல் இல்லை.
இது, மாணவர்களின் வாழ்க்கை தடத்தை புரட்டி விடுவதால், எதிர்காலம் கேள்விக்குறியாகவும் மாறிவிடும். இளம் தலைமுறையை ஆட்டுவிக்கும் இன்டர்நெட் வரமா… சாபமா… நல்லதா… கெட்டதா… வேண்டுமா… வேண்டாமா… என்ற யோசனையுடன், கம்பம் ஸ்ரீஆதிசுஞ்சனகிரி மகளிர் கல்லூரி மாணவியரை அணுகினோம்.
சும்மா சொல்லக் கூடாது, இன்டர்நெட் பயன்பாட்டை பற்றி நன்றாக தெரிந்து வைத்து, ஆழமாக விவாதித்தனர்.

* ஜி.சரண்யா: இன்டர்நெட் பயன்பாட்டின் மூலம், நகர்புற மாணவர்களுக்கு கிடைக்கும் கல்வி, வேலைவாய்ப்புகள் கிராமப்புற மாணவர்களுக்கும் கிடைக்கின்றன. நகர்புற, கிராமப்புற மாணவர்களுக்கு இடையிலான வேறுபாடு குறைந்துள்ளது. ஆனால், மாணவர்களின் வாசிக்கும் திறன் முற்றிலும் குறைந்து விட்டது.

* சி.லாவண்யா: பிரவுசிங் சென்டர்களில் நகர்புறம், கிராமப்புறம் வேறுபாடு இன்றி தவறுகள் நடக்கின்றன. இன்டர்நெட்டில் தேவையில்லாத பல தகவல்கள், மாணவர்களின் மூளையை மழுங்கச் செய்து, மனதை விஷமாக்குகிறது. “சாட்டிங், டேட்டிங்’ கலாசாரம் மாணவர் சமுதாயத்தை பெரும் ஆபத்தில் தள்ளி விடுகிறது.

* எம்.உமா மகேஸ்வரி: மாணவர்கள் போட்டி தேர்வுகளில் பங்கேற்க தேவையான எல்லா விஷயங்களும், இன்டர்நெட்டில் கிடைக்கின்றன. குறைந்த செலவில் வெளிநாடுகளில் உள்ள நம் குடும்ப உறுப்பினர்களின் முகம் பார்த்து தொடர்பு கொண்டு பேச முடிகிறது. இதனால், நன்மைகளே அதிகம் நடக்கின்றன.

* டி.நதியா: தற்போதைய தொழில் நுட்பத்தில், எல்லா “பாஸ்வேர்டு’களையும் திருடுகின்றனர். நம் இ-மெயில் முகவரியை பயன்படுத்தி, பயங்கரவாதிகள் சமூகத்திற்கு பேராபத்தை உருவாக்குகின்றனர். இதனால் ஏற்படும் பாதிப்பினை உணர முடிவதில்லை.

* என்.பிரியா: இன்டர்நெட் பயன்பாடு இல்லாவிட்டால், நாம் மிகவும் பின்தங்கி விடுவோம். இந்த உலக சூழ்நிலையோடு பொருந்த முடியாத சிக்கலில் மாட்டிக் கொள்வோம். வங்கி கடன் பரிவர்த்தனை, கல்வி உதவித்தொகை, அரசு திட்டங்கள், சரக்கு வர்த்தகம் எல்லாம் இன்டர்நெட் மயமாகி விட்டது.

* ஏ.அஷீரா பானு: படித்துக் கொண்டே இன்டர்நெட் மூலம் வேலைவாய்ப்பு பெறலாம். நமக்கு எது சரி, எது தேவை என்பதை பயன்படுத்த தெரிந்தால், இன்டர்நெட்டை வென்று விடலாம். நம்மை அறிவுசார்ந்த அடிமைகளாக மாற்றுகிறது என்பதும் உண்மை தான்.

* ஜி.முத்துலட்சுமி: மாணவர் சமுதாயத்தை குறி வைத்து ஆபாசமான தகவல்கள், படங்களை இன்டர்நெட் கிளப்புகள் வெளியிடுகின்றன. இளைய சமுதாயம் பாதிக்கப்படுகிறது என்பது தெரிந்தும், பல இணையதள சேவைகளை அரசு ஏன் இன்னமும் தடை செய்யவில்லை? இன்டர்நெட் பயன்படுத்துவது பற்றி தெளிவான வழிகாட்டுதல் வேண்டும்.

* வி.ரேவதி: இன்டர்நெட் என்ற கட்டுப்பாடற்ற சுதந்திரம், மாணவர்கள் சமுதாயத்தை மட்டுமல்ல, எல்லா தரப்பு மக்களையும் நெருக்கடியில் தள்ளுகிறது. உலகத்தின் மிகப்பெரிய அச்சுறுத்தலாக “ஆன்-லைன்’ மோசடி உருவாகி வருகிறது. திருமண மோசடிகளும் சமூக கலாசாரத்தை சீரழிக்கின்றன.

* கே.ஆதவி: வைரஸ் திருடர்கள், மோசடி பேர்வழிகள் எல்லோருக்கும் சிவப்பு கம்பளம் விரித்து வரவேற்கிறது. நம் போட்டோ கிடைத்தாலோ, வங்கி கணக்கு எண் கிடைத்தாலோ, நம்மை குழிதோண்டி புதைத்து விடுவர். விருப்பப்பட்ட அனைத்தும் ஒரே இடத்தில் எல்லாம் கிடைப்பதால் சோம்பலும், தேடும் திறனும் குறைந்து விடுகிறது. இவ்வளவு சுதந்திரம் வழங்குவதை அரசு தடுத்தேயாக வேண்டும்.

(dm)

செய்வீர்களா?வருங்கால முதல்வருக்கு ஒரு திறந்த மடல்….

ஐயா, அம்மணி, உங்களில் யாரோ முதல்வராக வரப்போகிறீர்கள். உங்களுக்கும் இப்போது அது சஸ்பென்ஸ். உங்கள் உறக்கத்தைக் கெடுத்துள்ள ஓட்டுப் பெட்டிகள் உறக்கத்தில் இருக்கின்றன. அவை எழுந்ததும், நீங்கள் யார் என்பது எங்களுக்கு தெரிந்துவிடும். மக்கள் எஜமானர்கள், நீங்கள் வேலைக்காரர்கள் என்கிறீர்களே… அது உண்மை, எங்கள் காதில் சுற்றிய பூ இல்லை என்பதை நம்பி, நாங்கள் எழுதும் திறந்த மடல் இது.

உங்கள் எதிர்பார்ப்புகள் இருக்கட்டும், எங்கள் எதிர்பார்ப்புகளை நீங்கள் தெரிந்து கொள்ள வேண்டாமா, அதற்காகவே இந்த கடிதம்.நீங்கள் பதவியேற்கும் முன்பே ஆரவாரம் தொடங்கும்; ஆடம்பரம் தொடரும். அதை நினைத்தால் பயமாக இருக்கிறது. ஐயாவே, அம்மணியே, நீங்கள் இப்போதே உங்கள் தொண்டர் படைக்குச் சொல்லி வைத்துவிட்டால், ஆரவாரமில்லாமல், உங்கள் வெற்றியை கொண்டாடலாம். அமைதிக்கு கவுரவம் உண்டு என்பதை புரிந்து கொள்ளுங்கள். உங்களை மட்டும் குறை சொல்லக்கூடாது… நாங்களே வெறும் கைதட்டிக் கூட்டம்… காக்காய் பிடிக்கும் கும்பல். புண்ணாக்கு சங்கம், பருத்திக்கொட்டை சங்கம், குதிரைக் குஞ்சு சங்கம், கோழிக்குட்டி சங்கம் என்று பல சங்கங்கள் வைத்திருக்கிறோம். இதுதான் எங்கள் சங்க காலம். ஒவ்வொரு சங்கமும் பத்திரிகைகளில், “போற்றி, போற்றி’ என்று போட்டி போட்டு உங்களை புகழ்ந்து விளம்பரங்கள் வெளியிடும்.அப்படி செய்யாதீர்கள் என்று நூற்றுக்கணக்கான சங்க நிர்வாகிகளை வேண்டிக்கொள்வீர்களா? நீங்கள் தீர்மானித்து விட்டால், இந்த விளம்பரங்கள் வராது. இப்படிப்பட்ட விழாக்களில் கலந்துகொண்டு நானும் உங்களைப் போல் கலப்பைக்காரன், கரண்டிக்காரி, சட்டிக்காரன், முட்டைக்காரி என்று சொல்வதைத் தவிர்ப்பீர்களா?

நீங்கள் இந்த மாதிரி சில குழுக்களுக்காக மட்டுமல்ல, எல்லாருக்குமே முதல்வர் என்பதை முழுமையாக புரிந்து கொள்வீர்களா? உங்களுக்கு வாக்களிக்காதவர்களுக்கும் நீங்களே முதல்வர்; சரிதானே.இந்த புதிய ஆட்சிக் காலத்தில் நீங்களோ, உங்கள் அமைச்சர் பெருமகன்களோ, பெருமாட்டிகளோ செல்லும் வழி நெடுக, கட்-அவுட்கள், படத்தட்டிகள், கொடிகள் வைப்பதைத் தடுப்பீர்களா? எந்த ஆரவாரமும் எவருக்கும் கவுரவம் சேர்ப்பதில்லை என்பதை கட்சித் தலைவர், கட்சித் தலைவி என்ற முறையில் புரிந்து கொள்வீர்களா?அரசுத் திட்டங்களின் அறிமுகமா? புதிய திட்டத்திற்கு அடிக்கல் நாட்டுவதா? பாலமோ, கழிப்பறையோ திறப்பதா? அங்கெல்லாம் முதல்வர் தன் பரிவாரத்துடன் சென்று விழா நடத்தும் சடங்குகளுக்கு முற்றுப்புள்ளி வைப்பீர்களா? விழாக்கள் மூலம் கிடைக்கும் விளம்பரம் வேறு வழிகளிலும் கிடைக்கும்; அதை நாடுங்களேன்.மறுபடியும் நீங்கள் ஆட்சிக்கு வர இருக்கும் நேரத்தில், உங்கள் தேர்தல் அறிக்கை, இலவசங்கள், சலுகைகள், மானியங்கள் பற்றி எதுவும் சொல்லாமல், இருக்கும் அளவுக்கு அடித்தட்டு மக்களின் வாழ்க்கைத் தரத்தை உயர்த்த வேண்டுமே. அவர்கள் என்றென்றும் கையேந்திகளாக இருந்தால் நீங்கள் அடிக்கடி சொல்லிக் கொள்ளும் சுயமரியாதைக் கொள்கைக்கு அது பொருத்தமாக இல்லையே. அதை உடனடியாக செய்துவிட முடியாது. ஆனால், ஆடம்பரங்களைக் குறைத்துக் கொண்டால், உருப்படியான திட்டங்களுக்கு பணம் செலவிடப்படலாம். இனி, இலவசங்கள் தேவைப்படாது என்ற நிலை உருவாக்கப் பாடுபடுவீர்களா?மக்களுக்கு கிரைண்டர், மிக்சி, பேன் தரும்போது, இதை முதலமைச்சராக உள்ள நான் தரவில்லை. அரசாங்கம் மூலம் இதை நீங்கள் இவற்றைப் பெறுவதற்குக் காரணம், வரி செலுத்தும் உங்கள் சகோதரர்களே என்ற உண்மையை பகிரங்கமாக சொல்லி, உங்கள் சுயமோகத்தை விரட்டிவிட்டு சகோதரத்துவத்தை வளர்ப்பீர்களா?கட்சிக்காரர்களை கட்சி அலுவலகத்துடன் நிறுத்திவிட்டு, கோட்டை பக்கம் வரவிடாமல் தடுப்பீர்களா?

கோட்டையில் அதிகாரிகளும், அமைச்சர்களும் பொது நலன்களுக்காக அல்லாத உரிய வேலைகளுக்காக வரும் மக்களே தென்பட வேண்டும், கரை வேட்டிகள் அல்ல. இதற்கான கறாரான ஏற்பாடுகளை செய்வீர்களா?காவல்துறையை ஏவல் துறையாக மாற்றாமல் இருப்பீர்களா?உங்கள் பி.ஏ.,க்கள், அமைச்சர்களின் பி.ஏ.,க் கள் ஒவ்வொருவரும் ஒரு குட்டி சமஸ்தானமாக மாறிவிடாமல் இருக்க, அவர்களைக் கண்காணிப்பீர்களா? நீங்கள் சரியாக இருந்தால் அவர்களும் சரியாக இருப்பார்கள் அல்லவா?அறைக்கு வெளியே இரு பக்கங்களிலும் பெரிய, மிகப்பெரிய “டிவி’ அளவுக்கு இரண்டு கம்ப்யூட்டர் மானிட்டர்கள் பொருத்தி, ஒன்றில் உங்களை அறையில் சந்திக்க வருகிறவர்கள் யார் என்ற தகவலையும், மறு திரையில் உங்கள் வசம் முடிவுக்காக காத்திருக்கும் கோப்புகள் எவை என்பதையும் தெரிவிப்பீர்களா? அதுதானே ஒளிவு மறைவு இல்லாத நிர்வாகம். செய்வீர்களா?உங்கள் அமைச்சர்கள் ஒவ்வொருவரும் இதைச் செய்ய வேண்டும் என்று கட்டாயப்படுத்துவீர்களா?அலுவலகத்தில் இருக்கும்போது, அலுவலக வேலையை மட்டுமே பாருங்கள்; வீட்டில் நீங்கள் குடிமக்கள் என்ற தினசரி நடைமுறையை வகுத்துக் கொள்ளுங்கள்; அதை அப்படியே செய்துவிட முடியாது. மாநிலத்தில் எங்காவது நெருக்கடி என்றால், நடவடிக்கை எடுக்க வேண்டும். ஏனென்றால், நீங்கள் எங்களது, 24 மணி நேர ஊழியர். அப்படி ஊழியம் செய்ய கூப்பிட்ட குரலுக்கு முக்கிய அதிகாரிகள் வரவேண்டும். அவர்கள் வரட்டும், அருகில் இருக்கட்டும். மற்றபடி கட்சிக்காரர்களை கட்சி அலுவலகத்துடன் நிறுத்திக் கொள்ளலாமே… செய்வீர்களா?

ஆட்சியிலும், கட்சியிலும் ஆடம்பரத்தையும், ஆரவாரத்தையும் அறவே ஒழிப்பீர்களா? பதவியேற்று மூன்று அல்லது ஆறு மாதம் கடந்த பிறகு வளர்ந்த நாடுகளுக்கு சென்று வாருங்கள். அங்கே அரசு சட்ட திட்டங்கள்படி நடைபெறுகிறதா, கட்-அவுட்களின்படி நடந்து வருகிறதா என்று பார்த்து வாருங்கள். அந்த ஒழுங்கு முறையை சாலைகளிலும், அரசு அலுவலகங்களிலும் கொண்டு வாருங்கள். அதுதான் முன்னேற்றத்தின் முதல்படி. உங்கள் வெளிநாட்டுப் பயணங்கள் வேறு காரணங்களுக்காக அமைய வேண்டாம். கமிஷன் என்றால், கமிஷனும் வரும். புரிகிறதா? மக்களுக்கு இப்போது அதிக விவரம் தெரிந்து விட்டது.வீட்டில் இல்லாத ஒழுக்கம் வீதியில் வராது. வீதியில் இல்லாத ஒழுக்கம் சமூகத்தில் வராது. சமூகத்தில் இல்லாத ஒழுக்கம் அரசாங்கத்தில் வராது. இப்போது சீர்திருத்தத்தை உங்களிடமிருந்துதான் தொடங்க வேண்டும். வருங்கால முதல்வரே, நீங்கள் யாராக இருந்தாலும் சரி… மக்கள் இனி புதிய தொடக்கத்தை எதிர்பார்க்கலாமா? எங்களால் ஏற முடியவில்லை; முடங்கிப் போய்விட்டோம். நீங்கள் இறங்கி வருவீர்களா, எங்களை ஏற்றிவிட?

(ஆர்.நடராஜன், அமெரிக்க தூதரக முன்னாள் அரசியல் ஆலோசகர்.)

ரிஷிவந்தியம் தொகுதி யாருக்கு சாதகம்

ரிஷிவந்தியம் தொகுதியில் பெண்கள் அதிகம் ஓட்டளித்துள்ளதால் காங்., உறுதியாக வெற்றிபெறும் என்று வேட்பாளர் சிவராஜ் தரப்பினர் மகிழ்ச்சியில் உள்ளனர். அதே வேளையில், பெண்களின் அமோக ஆதரவு விஜயகாந்திற்குதான் என்று தே.மு.தி.க., வினர் திடமாக கூறி வருகின்றனர்.

ரிஷிவந்தியம் தொகுதியில் தே.மு.தி.க., தலைவர் விஜயகாந்த்துக்கும், காங்., வேட்பாளர் சிவராஜிக்கும் இடையே கடும்போட்டி நிலவுகிறது. இருவரில் யார் வெற்றிபெறுவர் என்ற எதிர்பார்ப்பு அனைத்து தரப்பினராலும் ஆவலுடன் எதிர்பார்க்கப்படுகிறது. இத்தொகுதியில் 2 லட்சத்து 6,729 ஓட்டுக்கள் உள்ளது. இதில் 1 லட்சத்து 71 ஆயிரத்து 67 ஓட்டுக்கள் பதிவானது. மொத்த ஓட்டு பதிவு 82.75 சதவீதமாகும்.இதில் பெண்கள் மட்டும் 91 ஆயிரத்து 771 பேர் தங்களின் ஓட்டுக்களை பதிவு செய்துள்ளனர். பெண்களின் ஓட்டுப்பதிவு 93 சதவீதமாகும். கடந்த தேர்தல்களில் இல்லாத அளவுக்கு இத்தொகுதியில் பெண்கள் ஆர்வமுடன் ஓட்டளித்துள்ளது அனைவரையும் வியப் படைய செய்துள்ளது. இதனால் காங்., கட்சியினர் ஏக உற்சாகத்தில் உள்ளனர். இதற்கு காரணம் அரசின் பெரும்பாலான திட்டங்கள் பெண்களை மையப்படுத்தியே அதிகம் நிறைவேற்றப்பட்டதாவும், அவர்கள் ஆளும் கட்சி கூட்டணிக்கு சாதகமாக ஓட்டு போட்டிருப்பர் என்று சிவராஜ் தரப்பினர் நம்பிக்கையுடன் கூறுகின்றனர்.அதிலும் பெண்கள் சுயஉதவிக்குழுவினர் அதிக எண்ணிக்கையில் இத்தொகுதியில் அரசின் சுழல்நிதி கடன் பெற்று பயனடைந்துள்ளனர் என்றும், தேசிய ஊரக வேலை உறுதி திட்டம் சிறப்பாக செயல்படுத்தப்பட்டுள்ளதால் பெண்கள் பலரும் வருவாய் ஈட்ட வழி கிடைத்தது. இத்துடன் இலவச வீடு வழங்கும் திட்டத்தின் கீழ் பலருக்கும் அதற்கான அங்கீகார அட்டை வழங்கப்பட்டுள்ளதால் மீண்டும் தி.மு.க., ஆட்சி அமைந்தால் இலவச வீடு கிடைக்கும் என்பதால் இவ்விஷயத்தில் ஆண்களை விட பெண்களின் ஆதரவு ஆளுங்கட்சி கூட்டணியில் உள்ள காங்., கட்சிக்கு அதிகம் கிடைத்திருக்க வாய்ப்புள்ளதாக அக்கட்சியினர் கருதுகின்றனர்.

இதுமட்டுமல்லாமல் ஓட்டு போட பாகுபாடு இன்றி அனைத்து கிராமங்களுக்கும் காங்., கட்சி சார்பில் 200 ரூபாய் முதல் 500 ரூபாய் வரை பணம் பட்டுவாடா செய்யப்பட்டுள்ளது. இதனை வாங்கி கொண்டு பெண்கள் நிச்சயம் மாற்றி ஓட்டு போடமாட்டார்கள் என்றும், பெரும்பாலான ஓட்டுகள் காங்., கட்சிக்கு ஆதரவாக பதிவாகியிருக்கும் என்று சிவராஜ் தரப்பினர் உறுதியாக நம்புகின்றனர்.இப்படி பல கணக்குகளை போட்டு தங்களுக்கு சாதகம் என்று காங்., கட்சியினர் கூறிவரும் நிலையில் தே.மு.தி.க., வினர் எவ்வித பதட்டமும் இன்றி “கூலாக’ உள்ளனர்.அவர்கள் தரப்பில் கூறும் போது, திட்டங்களை காரணம் காட்டி காங்., கட்சி வெற்றிபெறும் என்று நினைப்பது வேடிக்கையாக உள்ளது என்று தே.மு.தி.க., வினர் கருத்து தெரிவிக்கின்றனர். விஜயகாந்த் பிரசாரத்திற்காக இத்தொகுதி கிராமங்களுக்கு சென்ற இடங்களில் எல்லாம் ஆண்களை விட பெண்களின் கூட்டம்தான் அதிகம் இருந்தது. அதேபோல் பிரேமலதா பிரசாரம் செய்தபோதும் பெண்கள் கூடிநின்று அவருக்கு ஆதரவளிப்பதாக ஆரவாரம் செய்ததை காண முடிந்தது.

சிவராஜ் எம்.எல்.ஏ., கடந்த 15 ஆண்டுகளாக தொகுதி முன்னேற்றத்திற்கு எந்த நடவடிக்கையும் எடுக்கவில்லை என்பது பெண்கள் மத்தியில் தான் அதிக எதிர்ப்பலையை உருவாக்கியுள்ளது. இப்படி இருக்கையில் பெண்களின் ஓட்டு காங்., வேட்பாளருக்கு சாதகமாக இருக்க வாய்ப்பில்லை என்றும், பெண்களின் பெரும்பான்மையான ஓட்டுக்கள் விஜயகாந்துக்கே கிடைத்துள்ளதால் அவர் வெற்றிபெறுவது உறுதி என்று தே.மு.தி.க., வினர் ஆணித்தரமாக கூறுகின்றனர்.

ரிஷிவந்தியம் தொகுதியில் பெண்கள் அதிகம் பேர் ஓட்டளித்திருப்பது தங்கள் கட்சிக்கே சாதகம் என்று இரு கட்சியினரும் கணக்கு போட்டு விவாதம் நடத்தி வருகின்றனர். பெண் வாக்காளர்களின் உண்மையான ஆதரவு யாருக்கு என்பது வரும் மே 13ல் தெரிந்துவிட போகிறது.

(dm)

ஆதங்கம் நியாயமானது!

வாக்குப்பதிவு நாளுக்கும் வாக்கு எண்ணிக்கைக்கும் ஒரு மாத கால இடைவெளி இருப்பதால் அரசு நிர்வாகம் எந்தப் பணியையும் செய்ய முடியாமல் முடங்கும் நிலை ஏற்பட்டுள்ளதாகவும், ஜூன் மாதத்தில் தொடங்க இருக்கும் தென்மேற்குப் பருவமழை காலத்தின்போது வேளாண்மைப் பணிகள் முறையாக நடைபெறுவதற்குச் செய்ய வேண்டிய பராமரிப்பு ஆய்வுப் பணிகளைக்கூட அதிகாரிகள் மேற்கொள்ள முடியாமல் தேர்தல் ஆணையத்தின் ஆணை தடுக்கிறது என்றும் முதல்வர் கருணாநிதி குற்றம் சாட்டியிருக்கிறார். இந்தப் பிரச்னையில் முதல்வரின் ஆதங்கம் நியாயமானது என்பது மட்டுமல்ல, ஜனநாயகம் முறையாக நடைபெற வேண்டும் என்று விழையும் அனைவரின் சிந்தனைக்குரியதும்கூட.

தேர்தல் தேதிகள் அறிவிக்கப்பட்ட உடனேயே, “காத்திருப்பு தேவையில்லை’ என்கிற தலைப்பில் “தினமணி’ ஒரு தலையங்கம் தீட்டியிருந்தது. அதில் குறிப்பிட்டிருந்த சில கருத்துகளை வாசகர்களின் பார்வைக்கு மீண்டும் பதிவு செய்கிறோம்.

“”ஒவ்வொரு மாநிலத்திலும் ஒவ்வொரு தேதியில், ஒரே நாளில் அல்லது பல கட்டங்களில் வாக்குப் பதிவை நடத்த முடியும் என்றால், வாக்கு எண்ணிக்கையை மட்டும் ஏன் ஒரே நாளில் நடத்த வேண்டும்? அந்தந்த மாநிலத்துக்கு ஏற்ப வாக்கு எண்ணிக்கைத் தேதியை நிர்ணயிப்பதில் என்ன தவறு? இதில் நடைமுறைச் சிக்கல் என்ன?

மக்களவைத் தேர்தல் நடத்தப்படும்போது, தேர்தல் முடிவுகள் ஒரே நேரத்தில் வெளியாகும் வகையில், வாக்கு எண்ணிக்கையை ஒரே நாளில் நடத்துவதுதான் சரியானது. ஏனென்றால், ஒரு மாநிலத்தில் ஒரு தேசியக் கட்சிக்குக் கிடைக்கும் அதிகமான வெற்றி அல்லது அதுபற்றி தேர்தலுக்குப் பிந்தைய கணிப்புகள் வாக்குப்பதிவு நடைபெற்றுக் கொண்டிருக்கும் மற்றொரு மாநிலத்திலும் வாக்காளர்களிடையே உளவியல் தாக்கத்தை ஏற்படுத்தி, வெற்றிபெறும் கட்சிக்கே தங்கள் வாக்கு என்ற மனநிலையை உருவாக்கும் என்பதால் இதை ஏற்றுக் கொள்ளலாம். ஆனால், சட்டப்பேரவைத் தேர்தலின் முடிவுகள் அந்தந்த மாநிலத்தோடு மட்டுமே தொடர்புடையவை.

இதுபோன்று 30 நாள் இடைவெளி தருவதால் தேவையில்லாத பிரச்னைகளுக்குத் தேர்தல் ஆணையம் வழி வகுக்கிறது. தேர்தல் ஆணையம் இந்தப் பிரச்னையில் மறுபரிசீலனை மேற்கொண்டு தவறைத் திருத்திக்கொள்ள வாய்ப்பு இருக்கிறது. அடம்பிடிக்காமல் நடைமுறைச் சிந்தனையுடன் ஆணையம் செயல்பட்டால் நல்லது” என்று அந்தத் தலையங்கத்தில் குறிப்பிட்டிருந்தோம்.

மக்கள் பிரதிநிதித்துவச் சட்டத்தின்படி, தேர்தல் தேதி அறிவிக்கப்பட்ட உடன் அரசு நிர்வாகம் ஆணையத்தின் கட்டுப்பாட்டுக்குள் வந்து விடுகிறது. அப்படி இல்லாமல் போனால், தேர்தல் நடைமுறைகளை ஆளும் கட்சிக்குச் சாதகமாக ஆட்சியாளர்கள் வளைத்துக் கொள்வார்கள் என்பதும், பெரிய அளவில் தேர்தல் தில்லுமுல்லுகள், பண விநியோகம் நடைபெறும் என்பதுதான் அதற்குக் காரணம். தேர்தலில் போட்டியிடும் அனைத்து வேட்பாளர்களும் ஆளும் கட்சி, எதிர்க்கட்சி, உதிரிக் கட்சி, சுயேச்சை என்கிற வேறுபாடு இல்லாமல் சமபலத்துடன் தேர்தலில் பங்குபெற இது தேவைப்படுகிறது என்பதிலும் நமக்கு மாற்றுக் கருத்து இல்லை.

அதேநேரத்தில், தேர்தல் முடிந்துவிட்ட நிலையில் வாக்கு எண்ணிக்கையை ஒரு மாத காலத்துக்குத் தள்ளிப்போட்டு, அதிகாரம் இல்லாத காபந்து அரசிடம் நிர்வாகத்தை ஒப்படைப்பது பிரச்னைகளுக்கு வழிகோலுவதாக அமைந்துவிடும். திடீரென்று சுனாமி போன்ற இயற்கைச் சீற்றமோ, ஒரு பேரழிவோ ஏற்பட்டது என்றால், அதை நிர்வாகம் வேடிக்கை பார்த்துக் கொண்டிருப்பதா, முதல்வர் மௌனம் காப்பதா, இல்லை தேர்தல் ஆணையத்தின் உத்தரவுக்குக் கட்டுப்பட்டு அதிகாரிகள் செயல்படுவதா? அப்படியொரு விபரீதம் ஏற்பட்டுவிடவில்லை, ஏற்படவும் வேண்டாம். ஆனால், நாம் தொலைநோக்குப் பார்வையுடன் இந்தப் பிரச்னையை அணுகாமல் இருக்க முடியாதே?

இன்றைய முதல்வர் கருணாநிதி சந்திக்கும் இந்த விசித்திரமான சூழ்நிலை நாளைக்கு முதல்வராக வரக்கூடிய எவருக்குமே ஏற்படலாம். இந்தியாவின் அனைத்து மாநிலங்களிலும் இதுபோன்ற பிரச்னை இன்றைக்கு இல்லாவிட்டாலும் நாளைக்கு ஏற்படலாம்.

தேர்தலுக்கு மூன்று மாதத்துக்கு முன்பு, ஆட்சியில் இருக்கும் அரசு பதவி விலகி குடியரசுத் தலைவர் ஆட்சி அமல்படுத்தப்படுவது இதற்கு மாற்றாக இருக்கும் என்று ஒரு யோசனை மக்கள் பிரதிநிதித்துவச் சட்டத்தில் திருத்தம் கொண்டுவரப்பட்டபோது, மக்களவையில் சில உறுப்பினர்களால் முன்வைக்கப்பட்டது. மாநில அரசுகள் கலைக்கப்பட்டு, குடியரசுத் தலைவர் ஆட்சியின்கீழ் தேர்தல் நடந்தால், அது மத்திய ஆளும் கட்சிக்குச் சாதகமான சூழ்நிலையை ஏற்படுத்தக்கூடும் என்பதால் அந்த யோசனை கைவிடப்பட்டது. மேலும், மக்களவைத் தேர்தல்களின்போது என்ன செய்வது என்கிற கேள்வியும் எழுகிறது.

முதல்வர் எழுப்பியிருக்கும் நியாயமான கேள்விக்குத் தேர்தல் ஆணையம் மட்டுமல்ல, இந்திய அரசும் வழிகாண வேண்டிய கட்டாயம் உள்ளது. எல்லா அரசியல் கட்சிகளையும், மாநிலங்களையும் பாதிக்கும் பிரச்னை இது என்பதால், இந்தியாவின் மூத்த அரசியல் தலைவர் என்கிற முறையில் முதல்வர் கருணாநிதி இந்தப் பிரச்னையை விவாதிக்க முதல்வர்கள், எதிர்க்கட்சித் தலைவர்கள், முன்னாள் தேர்தல் ஆணையர்கள், சமூக ஆர்வலர்கள் என்று அனைவரையும் அழைத்து ஒரு கருத்தரங்கை நடத்தினால்கூட நல்லது.

மக்களாட்சி, காலத்துக்கு ஏற்றாற்போல மாற்றிக் கொள்ளும், மாறிக் கொள்ளும் வாய்ப்பை நமக்கு அளிக்கிறது. முதல்வர் எழுப்பி இருக்கும் கேள்வி விவாதிக்கப்பட வேண்டியது மட்டுமல்ல, ஒரு நல்ல முடிவு காணப்பட வேண்டிய ஒன்றும்கூட!

(di)

கலைந்து போனதா “காமராஜர் ஆட்சி’ கனவு? காங்கிரசில் கவலை

தமிழகத்தில், “காமராஜர்’ ஆட்சி அமைப்போம் என்ற காங்கிரசாரின் கனவு நனவாகுமா என்ற கேள்வி எழுந்துள்ளது. இத்தேர்தலிலும் கழகங்களோடு கூட்டணி என்ற முடிவை எடுத்தது தான், இந்த கேள்விக்கு காரணமாக அமைந்துள்ளது.

தமிழகத்தில் கடந்த, 1967ம் ஆண்டு தேர்தலில், காங்கிரஸ் ஆட்சிக்கு வில்லனாக, தி.மு.க.,வின் வளர்ச்சி அமைந்தது. விலைவாசி ஏற்றம், இந்தி மொழி எதிர்ப்பு போன்ற பிரச்னைகளை சமாளிக்க முடியாமல், காங்கிரஸ் ஆட்சி திணறியது. இதை, நல்ல முறையில் பயன்படுத்திக் கொண்டு, காங்கிரஸ் கட்சிக்கு எதிராக, தி.மு.க., தேர்தல் பிரசாரம் செய்தது. சுதந்திரம் அடைந்தது முதல், தமிழகத்தில் தொடர்ந்து, 15 ஆண்டுகள் ஆட்சிக் கட்டிலில் அமர்ந்திருந்த காங்கிரஸ், படுதோல்வி அடைந்தது.

1967ம் ஆண்டு முடிந்து போன காங்கிரஸ் சகாப்தம், மீண்டும் தமிழகத்தில் ஏற்படுவதற்கு வாய்ப்பில்லை என்ற நிலை தான், 44 ஆண்டுகளாக தொடர்கிறது. இடைப்பட்ட ஆண்டுகளில் நடந்த சட்டசபை மற்றும் லோக்சபா தேர்தல்களில், ஏதாவது ஒரு கழக கட்சியின் தோள்களில் அமர்ந்து, காங்கிரஸ் தேர்தலை சந்தித்து வருகிறது. ஒவ்வொரு முறையும், “தமிழகத்தில் காமராஜர் ஆட்சி அமைய பாடுபடுவோம்’ என, காங்கிரசில் உள்ள கோஷ்டி தலைவர்கள் லாவணி பாடி வந்தனரே தவிர, அதற்கான முயற்சியில் யாரும் ஈடுபடவில்லை. தனித்து போட்டியிடவோ அல்லது கூட்டணிக்கு தலைமையேற்று போட்டியிடவோ சக்தியில்லாததாக காங்கிரஸ், “பேரியக்கம்’ ஆகி விட்டது.

இந்த தேர்தலில் தி.மு.க.,வுடன் இணைந்து போட்டியிட்ட காங்கிரஸ், முன் எப்போதும் இல்லாத வகையில், 63 தொகுதிகளை கேட்டு பெற்றது. “கொடுத்ததை வாங்கிக் கொள்ளுங்கள்’ என்று ஒவ்வொரு முறையும் அதட்டி பேசி வந்த தி.மு.க., தலைமை, ஸ்பெக்ட்ரம் விவகாரம், பின் அதை தொடர்ந்து வந்த சி.பி.ஐ., ரெய்டுகள் ஆகியவற்றால் ஆடிப்போய், காங்கிரஸ் கேட்ட தொகுதிகளை கொடுத்து விட்டது. கேட்ட தொகுதிகளை பெற்றதே பெரும் வெற்றி தான் என, கதர் சட்டைகள் பெருமிதப்பட்டுக் கொண்டன. ஆனால், ஸ்பெக்ட்ரம் விவகாரத்திற்கு பிறகும், தி.மு.க.,வுடனான கூட்டணியை காங்கிரஸ் தொடர்ந்துள்ளதால், அவர்களது, “காமராஜர் ஆட்சி’ கனவு, கனவாகவே போய்விடும்!

கடந்த, 1967ம் ஆண்டில் இருந்து, கழக கட்சிகளே மாறி, மாறி ஆட்சிக்கு வருகின்றன. இரண்டு கழகங்கள் மீதும் ஏராளமான ஊழல் புகார்களும், அது குறித்த வழக்குகளும் உள்ளன. இதனால், வெறுத்துப்போன மக்கள், கழகங்கள் அல்லாத ஒரு கட்சி ஆட்சிக்கு வர வேண்டும் என விரும்புகின்றனர். மக்களின் இந்த மனமாற்றத்தை, காங்கிரஸ் கட்சி இந்த தேர்தலில் பயன்படுத்தியிருக்க வேண்டும். “ஸ்பெக்ட்ரம் ஊழலால் கறைபடிந்துவிட்ட தி.மு.க.,வுடன், இனி கூட்டணி இல்லை’ என அதிரடியாக அறிவித்து, மூன்றாவது அணியை உருவாக்கியிருக்க வேண்டும். தே.மு.தி.க., – ம.தி.மு.க., போன்ற கட்சிகளையும், கூடவே சில சில்லறை கட்சிகளையும் உள்ளே இழுத்துபோட்டு, ஒரு அணியை அமைத்திருக்க வேண்டும். கோஷ்டி தலைவர்களில் செல்வாக்கு பெற்ற ஒருவரை முதல்வர் வேட்பாளராக அறிவித்து, “ஊழல் இல்லாத ஆட்சியை தருவோம்; மீண்டும் காமராஜர் ஆட்சி மக்களுக்கு கிடைக்கும்’ என, பிரசாரம் செய்திருக்க வேண்டும். ஏற்கனவே ஒரு மாற்றத்தை விரும்பி நிற்கும் மக்கள், இந்த அணிக்கு திரளான ஆதரவை கொடுத்திருப்பர். ஆனால், அந்த வாய்ப்பை கை நழுவவிட்டு விட்டது காங்கிரஸ். இதற்கு, காங்கிரசில் இருக்கும் கோஷ்டி மோதலே காரணம்.

இன்றைய நிலையில், சில கோஷ்டிகள் தி.மு.க.,விற்கும், சில கோஷ்டிகள் அ.தி.மு.க.,விற்கும் சாமரம் வீசிக் கொண்டிருக்கின்றன. இந்த கோஷ்டிகள் தான், காங்கிரசை காட்டிக் கொடுத்து, காமராஜர் ஆட்சியை ஏற்படுத்தவிடாமல் தடுத்து விட்டன. இப்படி ஒரு பொன்னான வாய்ப்பு, இனி வரும் தேர்தல்களில் காங்கிரசுக்கு கிடைக்குமா என்பது சந்தேகமே. ஆனால், இதை காங்கிரஸ் கட்சியின் ஒரு பிரிவினர் மறுக்கின்றனர். “காமராஜர் ஆட்சி’ என்ற எங்களின் லட்சியம் இப்போதும் நிறைவேற வாய்ப்புள்ளது என்கின்கின்றனர்.

இதுகுறித்து அவர்கள் கூறியதாவது: நாங்கள் அதிக தொகுதிகளை கேட்டு வாங்கியதால், தி.மு.க., குறைந்த இடங்களில் போட்டியிடுகிறது. தி.மு.க., கூட்டணி ஆட்சி அமைந்தால், காங்கிரசின் தயவில் தான் மீண்டும் ஆட்சி அமைக்க முடியும். கடந்த முறை போல நாங்கள் விட்டுத்தராமல், இம்முறை கூட்டணி ஆட்சிக் கோரிக்கையில் உறுதியாய் இருப்போம்; அதில் வெற்றி பெறுவோம். இதன் மூலம், தமிழகத்தில் காங்கிரசும் அரியணை ஏறும். இது, “காமராஜர்’ ஆட்சிக்கு அடித்தளமாக அமையும். இவ்வாறு அவர்கள் தெரிவித்தனர்.

(dm)

ஒரு ஊழலுக்கு மாற்று இன்னொரு ஊழலா?

சட்டசபை தேர்தலில், 80 சதவீதத்திற்கு அதிகமாக மக்கள் ஓட்டளித்துள்ளனர். இது ஜனநாயகத்திற்கு கிடைத்த வெற்றி என்பதா? ஆட்சியாளர்கள் மீதிருந்த அதிருப்தி என கொள்வதா? வாக்காளர்கள் கடமை இதோடு முடிந்து விட்டதா? நாம் யாரை தேர்வு செய்ய ஓட்டளித்து இருக்கிறோம்? அடுத்த ஐந்து ஆண்டுகள் எந்த ஊழல் கட்சி கையில் அதிகாரம் போகப் போகிறது?

தமிழ்ப் பண்பாடு, நாகரிகம், கலாசாரம், ஐயாயிரம் ஆண்டுகள் பழமையானது. ஆயிரம் ஆண்டுகளுக்கு முன்பே, “குடவோலை’ ஓட்டு முறை மூலம், ஜனநாயகத்தை உலகத்திற்கு கற்றுத் தந்தவர்கள் தமிழ் மன்னர்கள். சர்வ அதிகாரமும் பெற்றவன் மன்னன். அனைவரும் அவன் கொடை கீழ் தான் என்றிருந்த போதும், தமிழ் மன்னர்கள் ஜனநாயகத்தைப் போற்றி வந்திருக்கின்றனர்.

குற்றமிழைத்தவர்கள், கொலைகாரர்கள், குடிகாரர்கள், சமூக அந்தஸ்து இல்லாதவர்கள், தனக்குப் பின் தன் வாரிசு என்போருக்கெல்லாம் தேர்தலில் போட்டியிடத் தகுதியில்லை என, அன்றே நிர்ணயித்தவர்கள் தமிழர்கள். ஆனால், இன்று அவைகள் குப்பைத் தொட்டியில் வீசப்பட்டது கண்டு, நெஞ்சம் கனக்கிறது. அன்றைய 10ம் நூற்றாண்டில் மட்டுமல்ல, இன்றைய, 21ம் நூற்றாண்டிலும் தமிழகம் தலை நிமிர்ந்து தான் நின்றது. உலகின் மிகப்பெரும் ஐ.டி., நிறுவனங்கள், நாசா போன்ற விண்வெளி அமைப்புகள், தமிழர்களையும், சீனர்களையும் தான் தங்கள் நிறுவனங்களுக்கு தேர்வு செய்தனர். தமிழர்களின் அறிவுத்திறன், வேகம், முற்போக்கு சிந்தனையே இதற்கு காரணம் என்று பில்கேட்ஸ் முதலானோர் கூறினர்.

இத்தகைய பெருமை பெற்ற தமிழகம், 1.76 லட்சம் கோடி ரூபாய் ஊழல் புரிந்து தமிழ், தமிழன் என்று பேசி, நம்மை ஏமாற்றி, உலகம் நம்மை எள்ளி நகையாட வைத்த கட்சிகளால், இன்று, தலைகுனிந்து நிற்கிறது. ஓட்டளித்த 80 சதவீத மக்கள், இன்றைய ஆட்சியாளரை மாற்றிவிட்டால், இந்த நிலை மாறி விடுமா? தமிழகம் மீண்டும் தலைநிமிர்ந்து விடுமா? ஆட்சியாளர்களுக்கு நாம் அதிகாரம் வழங்குகிறோம், பொறுப்பு கொடுக்கிறோம். அதற்கு ஆட்சியாளர்கள், மக்களுக்கு பதில் சொல்ல கடமைப்பட்டவர்கள். அவர்கள் பதில், ஐந்தாண்டுக்கு ஒருமுறை தேர்தலின் போது மட்டும் தான் இருக்கிறது என்பதும் ஒரு காரணம். மக்கள் நலனுக்காக ஆட்சி செய்ய வேண்டிய நல்லவர்கள் கிடைக்காததால், வாக்காளர்களும், உண்மையான ஆட்சி மாற்றத்தை செய்ய முடியாமல், இதுவரை, ஒரே தோசையை திரும்பத் திரும்ப, திருப்பிப் போட்டுக் கொண்டிருக்கின்றனர். இதற்கு என்ன தீர்வு? புதிய ஆட்சியாளர்களை கொண்டு வர முடியாதா? ஆளும் கட்சியின் செயல்பாடுகளை கட்டுப்படுத்த சட்டசபைக்குள்ளும், சட்டசபைக்கு வெளியேயும் ஒரு மூன்றாவது சக்தி வேண்டும்.

அது தரமான, தகுதியான, நிரூபிக்கப்பட்ட, மக்கள் நலம் விரும்பும் சக்தியாக இருக்க வேண்டும். நீதிபதிகள், தேர்வாணைக் குழு நிர்வாகிகள், பல்கலைக் கழக துணைவேந்தர்கள் என்பன போன்ற பல்வேறு மக்கள் நல முக்கியத்துவம் வாய்ந்த பதவிகளில், ஆளும் கட்சியின் ஜால்ராக்கள் அல்லது தகுதியில்லாதவர்கள் நியமிக்கப்படுவதைத் தடுக்க, இந்த மூன்றாவது சக்தி சட்டசபைக்குள் வர வேண்டும்.

சட்டசபைக்கு வெளியேயும் ஒரு மூன்றாவது சக்தி தேவை. அதுவும், தரமும், தகுதியும் வாய்ந்த அரசு சாரா பொது நல அமைப்பாக இருக்க வேண்டும். இன்று ஊழலுக்கு எதிராக, இந்தியாவை உலுக்கிய, இளைஞர்களை கவர்ந்த சமூக ஊழியர் அன்னா ஹசாரேவின் ஊழல் எதிர்ப்பு இயக்கம் மாதிரியான ஒரு காவல் அமைப்பு வேண்டும். அதில் பொதுமக்கள் பெருமளவு பங்கு கொள்ள வேண்டும். இந்த சமூக அமைப்பிலிருந்து பாதி பேர், அரசின் பிரதிநிதிகள் பாதி பேர் என்று சேர்ந்த குழுவே, அரசின் கொள்கைகளை முடிவு செய்ய வேண்டும். அந்த முடிவுகளே இறுதியில் சட்டமாக்கப்பட வேண்டும். ஐந்து ஆண்டுக்கு ஒருமுறை மட்டுமே ஆட்சியாளர்களின் செயல்பாட்டுக்கு ஓட்டுரிமை மூலம் மக்கள் தீர்ப்பளிக்கின்றனர். அதுவும், இன்றைய அரசுக்கு தண்டனை தரப்படுகிறதே தவிர, நாளைய நல்ல அரசு தேர்வுக்கான தீர்ப்பாக அது இருப்பதில்லை.

இந்நிலை மாற வேண்டும் என்றால், அரசின் ஐந்து ஆண்டு கால செயல்பாட்டிலும், மக்களின் பங்கும், பங்களிப்பும் இருக்க வேண்டும். ஓட்டுரிமை பயன்படுத்தும் போது மட்டுமே வாக்காளர்களின் பங்கு அரசியலில் இருக்கிறது என்ற நிலை உள்ளதாலேயே, இம்மாதிரி ஊழல் அரசுகள் வந்து போகின்றன. அரசின் செயல்பாடுகள் வெளிப்படையாக இல்லை. உள்ளொன்றும், வெளியொன்றும் என இரு முகங்களில் உள்ளதை, “விக்கிலீக்ஸ்’ இணையதளம் வெளிச்சம் போட்டு காட்டி வருகிறது.

அரசை யாரெல்லாம் நடத்துகின்றனர்? தமிழ், தமிழன், இந்தியன் என்போரெல்லாம், இந்தியாவின் இறையாண்மையை எப்படி வெளிநாட்டிற்கு விற்கின்றனர்? பன்னாட்டு கம்பெனிகள் எப்படி இந்திய அரசுகளை ஆட்டிப் படைக்கின்றன? இவையெல்லாம் விக்கிலீக்ஸ் மூலம் நாம் தெரிந்து கொள்ள முடிந்தது. இந்த நிலை தொடராமல் இருக்க, அரசின் கொள்கை முடிவு எடுப்பதில், அதை அமல்படுத்துவதில், வாக்காளர்களாகிய நம் பங்கு இருக்க வேண்டும். அதுவும், ஆட்சி செய்யும் ஐந்து ஆண்டு காலமும் இருக்க வேண்டும். இதற்கு நம் உரிமைகளை நாம் தெரிந்து கொள்ள வேண்டும். அப்போது தான், ஜனநாயக தத்துவத்தை குடை சாய்க்கும் ஆட்சியாளர்களை தடுத்து நிறுத்த முடியும். மக்களிடம் விழிப்புணர்வு ஏற்பட்டாலே இது சாத்தியம்.

இதில், பத்திரிகை, ஊடகங்கள் பங்கு மகத்தானது. அன்னா ஹசாரேவின் ஊழல் எதிர்ப்பு இயக்கத்தை நான்கே நாட்களில் உலகறியச் செய்தது ஊடகங்கள் தான். இதே ஊடகங்கள் தான், தரமுள்ள, தகுதியாக மூன்றாவது சக்தியை சட்டசபைக்குள் கொண்டு செல்ல காரணமாக இருக்க வேண்டும். சட்டசபைக்கு வெளியே வலிமையான மக்கள் சக்தி கொண்ட, தகுதியான சமூக குழுக்களை உருவாக்க பத்திரிகைகள் உதவ வேண்டும். இந்த இரண்டும் நடக்கும்போது, ஊழல் பறந்தோடும்; நேர்மை நெஞ்சு நிமிரும்; தமிழகம் மீண்டும் தலை நிமிரும்.

எஸ்.ஆர்.சேகர், பா.ஜ., தமிழக செய்தி தொடர்பாளர்.

(dm)